|
兄弟戴綠帽，傷過自己戴。
尢其是佢嗰頭講完自己好彩搵到個純品女朋友，喺港女橫行嘅時代，竟然可以拍八年長拖，節衣縮食，儲多陣錢就可以上車買個兩百零萬單位做樓奴。我兄弟Alan搵兩萬蚊個月，PS4都唔捨得買，日日就睇達哥開台踢Fifa，一年都買唔夠三件衫，死儲爛儲係佢嘅生活哲學，為左將來嘅生活美滿啲。
儲左八年，儲出一頂綠帽。
話說當日，觀塘Apm朝地鐵站入口，我當日咁岩因為公司野喺附近，見到事主Ivy同另一個高高大大，皮膚黝黑，似乎甚為精壯嘅猛男一齊，十指緊扣。面對面撞到正，Ivy同我四目交投，嚇到面無血色。猛男見到我地反應有啲奇怪，開口問：「你朋友呀？」
「你男朋友呀？」我微笑問Ivy，望一望個男人，發覺自己無六尺高，講野真係會輸左個勢。 呢個開場就好似偶像劇男主角分完手想箍煲時，見到第三者，空氣彌漫住嗰種奇怪氣氛。 「喂！求其花！又會喺度撞到你嘅！好耐無見啦！」Ivy即刻擺出可以角逐金鐘獎既演技，而所謂既好耐，係兩個星期左右。
除夕我地一齊倒數架喎……你個……我急怒攻心，睇黎佢知我唔係即時反檯嗰啲人。猛男見Ivy一下子咁熱情，又比我問一問佢身份，佢對我微笑，伸手將Ivy攬埋自己度。
I literately 嬲到心室悸動。
「Martin。」猛男充滿自信，伸出佢隻右手向我示好，同時露出陽光燦爛嘅微笑，我心諗你呢個人渣又啲客套野又做得幾足。我從頭到腳望多次佢，無Blazer既西裝造型(恤衫西褲)，似係一般打文職工，佢有激凸嘅胸肌、陽光嘅笑容、精壯嘅胴體，令佢搶到Ivy返黎……
然後成為一對狗男女。
我承認自己有極大成見，皆因Alan同我真係識左好耐，Ivy喺我心目中都係溫柔賢慧又帶得出黎見人嘅絕世好女人，呢條友我唔知係好有錢定係性能力持久，可以將一個良家婦女變成背夫偷漢嘅淫娃，總之我唔信佢地係真愛啦。頂，我真係接受唔到，如果我兄弟Alan真心真意咁對待一個人，而條女竟然真心鍾意另一個人，咁會導致我對女人嘅觀感，甚至對整個世界嘅價值觀。
「我係Ivy大學同學求其花，喂Ivy，Alan話好耐都無見你啦，識左個男朋友都唔同我地講，帶埋出黎一齊玩嘛！」Ivy聽到後面色一沉，無諗到呢個時候我會搬佢男友出黎。我觀察猛男Martin嘅神色，無咩變化，甚至好開心咁講：「好呀！我都未識Ivy 啲朋友。」
個感覺好似兵仔服完十年兵役岩岩升做駙馬爺咁，初步睇黎佢唔知Ivy有男朋友，起碼唔知男朋友個名。
「好呀……上次講開件事呀，唔好同Alan講住喎，我今晚打比你再傾丫！」Ivy捉住我手腕，佢好緊張，但又要扮無野。
睇在識左咁多年嘅情份，我始終無當面拆穿佢。招呼打完自然就返公司，然後諗，其實愛情到底係啲咩？生活又係啲咩？我記得Alan同我講過，Ivy好恨嫁，近年多朋友結婚，每次觀禮新娘拋花球嘅時候，佢都會自言自語咁講：「拋過黎！拋過黎！」
「但佢無一次接到架，次次都唔掉佢嗰邊，有次落正佢頭頂，佢反而又唔敢接，結果比隔離個女仔跳起搶左個籃板球。」有次Alan同我食飯，又講開達哥近排轉咩game，好似幾好玩。我話不如幾千蚊買部機返黎啦，人都要娛樂架。
然後佢就同我講Ivy好恨嫁，平時食飯睇戲買禮物已經無點慳，家用又唔可以少，買PS4又唔可以唔買game……另外，佢用緊iphone 6，因為炒唔起局住硬食，佢為左儲錢上車，真係好努力。
儲左八年，儲出一頂綠帽。
我唔知點開口，當年套頭文字Ｄ入面，杜汶澤話見到夏樹同個男人入左酒店，驚周杰倫比人呃，想講，開頭都唔知開口。
「三萬蚊！過夜！你條女係雞呀！」講完，杜汶澤都要比周杰倫打啦。
何況，Ivy唔係雞，唔會因為肉體關係而收錢，如果佢今晚無返屋企，又無打比我……
「唔洗錢！過夜！你條女雞都不如呀！」我真係想像唔到Alan會點對我。
好彩，收左工，Ivy終於打黎。
「花，今日嘅事呢……其實我都想同你講架啦……」Ivy第一句已經返返去我所認識嘅和藹可親，相當賢慧嘅聲線，同中午喺Apm嗰個富有戲劇細胞嘅Ivy簡直兩個人。
「你想你自首，定係我篤爆你？」我諗野可以不著邊際，但講出黎最緊要簡單直接。
「OK，如果無彎轉嘅話，我地入正題。我岩岩已經同左Martin講我有男朋友，唔會再同佢聯絡。今日你見到嘅，無錯我係同過佢一齊，但我係唔會同Alan講，你要講嘅，決定權喺你度。但係你要知道，Alan唔可以無左我……」又返返去能言善辯嘅佢，我開始掌握唔到我兄弟條女到底係點嘅人
「你重好意思講呢啲？」我火都黎，捉到正都重要比女人威脅。
「……就好似我唔可以無左佢一樣。你會問點解我搵第二個，你地到底知唔知女人要咩？其實一句到尾，開心渣嘛。Alan太老實，好似水咁，Martin追左我好耐，一時間意亂情迷，我岩岩已經搞清楚晒啲關係……」
「佢係水？令你好無癮？咁你又拖住人？你以為Alan非你不娶？你以為……」我急怒攻心，忍唔住打斷Ivy。
「佢係水，所以我見識過外面嘅野，最後都會需要佢。我地一齊八年，佢有咩愛好，我知清楚過你。呢件事比Alan知道，如果我主動道歉，我肯定佢唔會同我分手，你識左佢咁多年，知架喎。但我點解要花時間先同你解釋，因為我知你係Alan兄弟，我想我地結婚嘅時候，唔會有任何芥蒂，你會係最好嘅伴郎。」Ivy將啲歪理講到似是而非，我一時間答唔到佢。
但我好清楚知道，八年感情，Alan為左成家立室，連機都唔打，洗多少少錢嘅應酬都唔去。上個月佢岩岩儲到四十萬，佢同我傾結婚同買樓嘅野，同時亦問緊我可唔可以cut左電話個3G Plan 但係whatsapp就keep住用。
「依家咁多地方有wifi，我朋友又唔多，公司同屋企又有電話……」Alan將自己慳到最盡……就係為左呢個女人。Alan都算得上一表人才，份人唔算好悶，唔煙唔酒唔打機，作為男朋友，唯一嘅缺點可能係九點半一定要準時睇達哥。
女死女還在，佢可以搵過個更好，但，如果你好清楚你兄弟真係非呢個女人不娶，個女人又好認真咁同你講無下次。
最重要嘅係，我憑咩做架兩先？
「我知你好嬲我，我都好多謝Alan有你呢個好兄弟，但係如果以後我都唔再犯，你揭發左我，而Alan都決定同我一齊嘅話，以後大家心入面有條刺，你只係破壞左一段八年嘅感情。我同Alan成日都講架，我地結婚，你一定要係伴郎呀，得你會最上心……」Ivy出絕招軟硬兼施，我心諗你個淫婦把口咁掂做咩唔去做Sales呢……
我無答實佢，就咁收左佢線。
然後，我一直諗緊一個問題，直到依家。
如果人地真係一個願打一個願捱，我為左自己嘅正義感去揭發人地……
係咪好自私？
279807
|
發表於 2016-10-4 05:28:33
收藏
分享
支持
踩
發表於 2016-10-14 07:38:32